Pipo té ka chanté simenn pasé an kannaval-la «kriyé ponpié, kriyé ponpié difé pri an kannaval-la» mé jistiman kom sé karenm difé ka pri toupatou. Sé pa vié zeb ka mété difé mé vié jes ek movez pèy ka limen difé toupatou.

Asou tranndé komin, ni ki set éti difé pa pri. Tout lérestan sé ponpié-a ka kriyé anmwé pas sé komin-an ka dwé yo lajan ek yo ka vréyé yo bèkalo. Fok di anlo komin rafen kon an kris anglé dan an galta alman, yo bien anvi mé yo ni priyorité. Pou yo zafè ponpié ka pasé apré pon yo pou fè an zafè élektè yo té ponmet sa dépi konmen tan avan éleksion.

Adjilbè di mwen vomié pa tonbé malad sé jou-tala. Ildèvè bien valé biyé dat nésans-li pas an malkadi pran’y ek lè sé ponpié-a pati, loto-a tonbé an pàn. Misié di mwen i wè an loto pati pou an entèvansion ek an lapot raché érezdibonnè sé ponpié-a té maré senti-yo. Pas sé pa sé koleg yo a ki té ké pé fè ayen ba yo.

Ou ka rann ou kont, ki léta nou si atjelman ni an tranblanntè, an sinami, an siklòn oben volkan-an désidé viré pété, ki divini nou?

Manmay fok trouvé an solision pas sé si ponpié an chikpongtong nou pé pati asou an pon oben anba an pon, pié douvan.

Jid

* * *

Sommaire Kréyolad

 Viré monté