Tout moun té ka atann Toto akondi sé le mési. Misié pa djè pòté bon nouvel. Misié anonsé ki lésans lan ka bésé 6 santim an Frans mé isi a kom la SARA ké wosé 6 santim nou pa pli avansé ki misié Rikilé. Yo négosié, yo palé, yo badjolé é an finaldikont yo tonbé dakò pou ayen pa chanjé. Rivé o rézimé ayen pa chanjé menmsi an kandida té di, chanjman sé atjelman. Sé atjelman nou ka wè tout bagay membrisi. Sa ka fè dézan Thierry ka konstaté i adan menm pwen an.

Tout bagay ka wosé menmsi gouvelman ka di i ka goumen pou chanjé sa atjelman menm.

Antouléka sé maren-péchè a pa kontan pas lésans yo a wosé. Yo mété 4 santim anlè’y. Ni yonndé manmay ki té lé baré lanmè a. Mé lézot konpèy la di’y, sé palapenm pas sé yo menm yo ké jennen.

Moun ka vini anlè lanmè, lè ni touw yol selman. Lèrestan sé jou a, sé péchè menm ka navidjé pou trapé lavi. Ti-Ernes pran an ton 50 liv mé i péyé 150 éro lésans i pa ni pies bénéfis.

Adjilbè li i bien sanfouté, li sé 50 éro lésans i ka fè, ki lésans wosé oben bésé. Zafè wosé bésé pa anlè kont li. Akondi pawol la «woch dan dlo pa konnet doulè woch an soley».

Ni moun ki vréyé pié pou di olié wosé bésé lésans lan, yo ni ka bésé pri manjé ek sé jou-tala pri sé matériel lékol la. Pas, asiré fanmi’y ka kriyé anmwé pas lanné pasé, pou an ti-manmay té antré lékol fok té ni 95 éro, lanné-tala sé opli ba 115 éro pa ti-manmay.

Adjilbè di mwen sé pri a ka dansé trop épi zafè wosé bésé-tala é lajan travay li pa ka brennen pas yo pa ka wosé pèy li.

Jid

Sommaire Kréyolad

 Viré monté