MLK lé kontan invit azot son gran rasanbloman lo dimansh 20 zyin 2010.

I fé pa lwin 20 an MLK i ègzis ofisyèlman, pa lwin 20 an MLK i vanz sirtou pou mèt anlér la lang, lidantité rényoné.

Apartir 2010-la, MLK lé anvi ardobout konmkifo, lé anvi rouv ali, èk dot moun, dsi dot problématik.

Ek dot moun, pars nou lé sir, nou lé pa tousèl pou voulwar-k na-d zafér i shanz, i bouz. Nou lé sir osi, tousèl, shakinn son shakinn dan son kwin, nou giny rapa fé riyin.

«èk ou saspé nou fé rapa gran shoz, san ou lé sir nou fé rapa riyin»

Dsi dot problématik, pars tanplis i sava, tanplis la sityasyon isi konm déor, i fé lér lé pa parti pou aranzé. Nout tout sra konsérné. Na pwinn mirak, na riyink in méyér konésans sak i èspas èk nout mèt-ansanm va dar nou la posibilité tyinbo ansanm. I fo nou kont si nou minm.

«par nou minm, pou nou minm, èk nou minm»

Pou sa i fo in landrwa. In landrwa rouvér, in landrwa-d partaz, ousa i éshanz. In landrwa-d kalkilaz, konsyantizasyon, ousa shakinn, èk son diférans, son sansibilité, solon son tan, i aminn son zidé, son gouté. Ousa nou wa koman nou giny mèt ansanm, koman nou avans ansanm. Angro, In landrwa sitwayin.

MLK sré kontan èt so landrwa-la.

Sé pou saminm, nou sré byin kontan war azot so zour-la.

Photo F. Palli.

MLK, 11 rue Justinien VITRY, 97480 Saint-Joseph, Réunion
Kontak: 06 92 46 30 47 @: mouvmanlantant_koudmin@yahoo.fr

Lire aussi: Au nom de la langue, Le Quotidien de la Réunion, 14.12.2009

 Viré monté