Potomitan

Site de promotion des cultures et des langues créoles
Annou voyé kreyòl douvan douvan

Calendrier des arbres
Décembre

Glirisidya

Hector Poullet

Gliricidia sepium

Gliricidia sepium. Photo Thierry Negi.

Kriyé-mwen jan zòt vlé
Glirisidya1 !
Glisiridya !
Gliséridya !
Glisérya  
Oswa, si sa pa fasil pou zòt di
kriyé-mwen toubòlman Alizya !
Sé non-lasa Ayisyen ban-mwen.
Kèlanswa !
A pa pou fè blagyè
mé pa ni pyébwa pliméyè pasé-mwen.
Dabò pou yonn an pa difisil
an ka pousé toupatou dépi an touché tè.
Tout mòso bwa an-mwen ka pousé
pli vit pasé on batzyé.
Kanta pou grenn an-mwen pa menm palé !
Epi dépi an konmansé fè fèy
Rasin an-mwen ka mélyoré tè-la
pou fè angré natirèl.
Kifè zòt ké vwè moun i konnèt travay tè
toujou planté ziyanm an pyé an-mwen
davwa an ka sèvi gòl pou kòd-yanm lyanné
atoupannan an ka nouri rasin a-y pou i fè bèl daré.
Mé a pa tout !
An ka fè lonbraj ki pou pyé-kako, ki pou pyé-kafé
Kifè désèrten ka jous kriyé-mwen Manman-kako.
Epi fèyaj an-mwen sé manjé pou kabrit é bèf
pannansitan  grenn an-mwen ka pwazonné sourit kon rat
Epi flè an-mwen !
Zòt ja vwè
lè mitan karenm tè sèk ka fann
lè tout pyébwa kagou ka hélé anmwé afòs yo swèf-dlo
lè mouch a miyèl ozabwa ?
Eben mi sé la an ka anni fléri
é tout bayè yo té fè pou hat-a-bèf
ka anni fè flè akwèdi pyé ponm-fwans
an prèmyé bòdaj a prentan lòtbò !
Bouké-flè chajé èvè siwo pou fè miyèl !
Epi osi… awa an pa ka di plis ki sa
zòt ké di sé blagyé an ka blagyé !

Èktò Poulé
(24 nov. 2014)

Note

  1. Gliricidia sepium ne se trouve pas dans le livre du RP Duss 1897. La plante a été probablement introduite aux Antilles ultérieurement.

Gliricidia sepium

Photo Claude Chaubo.

Gliricidia sepium

Photo F.Palli

Viré monté