Potomitan

Site de promotion des cultures et des langues créoles
Annou voyé kreyòl douvan douvan

Calendrier des oiseaux
Juin

Kokobino1

Hector Poullet

Cinclocerthia rificauda

Kokobino (Cinclocerthia ruficauda). Photo Frédéric Leviez, Source

To l to ! to !
Douvanjou
avan  pipirit
gran koul bèk
asi vit a finèt
a chanm an-mwen
To ! to ! to !
Plim a kyé
plim a zèl 
ka tranblé
akwèdi
fwédi
té ké ka fè
Manzèl griv gligliyé.

Zyé a-y sé zéklè
pou di jan i kòlè !

Douvanjou sé lè
kouch an-nou ka dou !
Kokobino chè doudou
tanprisouplè
ban-mwen on favè a-w
lésé-mwen dòmi révé
tibwen ankò.

Dèyè rido a finèt-la
an plis ki sav
hak pa grav
sé anni
on griv tranblèz
ka kongné
èvè gran bèk a-y
To ! to ! To !

Mé ! Awa !
On griv ?
A pa on griv.
Gay sa !
Sé on fanm
On bèl madanm
Lagyablès pétèt
ka fè-mwen sign
Vini-w ! Vini-w  chè !
Totoblo ! Totoblo !
Fi-la vlé mwen lévé
sòti an kabann an-mwen
an tidouvanjou-la
pou mwen vini jwenn-li
dèwò-la !
Mé poukisa ?
Awa !

To ! To ! To !
Kokobino doudou
Chéridamour an-mwen chè
lésé-mwen dòmi tibwen ankò.
Gadé byen
a pa p’on alvèsè ou ka vwè la
gadé  sé anni on pòtré
pwòp pòtré a-w
ou ka vwè
adan glas a finèt-la.
Alé-w !
Alòkifè
Manzè Lagyablès
ay fè zafè a-y.

Ektò Poulé
Kapèstè, 10 Mé 2015

 

Note

  1. Kokobino, petit chéri, est le nom local de la grive trembleuse ou Trembleur brun: Cinclocerthia rificauda.

"La grive qui tape à ma fenêtre." Hector Poullet.

Viré monté