« Sa ou pa konnèt gran pasé-w ! »

Mi  on tipawòl-vérité
fanmi an-nou té enmé di !
Asiré pa pétèt moun i pa konnèt
pé ké rivé kwè si sa an kay di la vré
kanmenmsi sé Pè Médouz i ban mwen fré-lasa. 
Kouté  pou tann
sa granmoum-la té ka rakonté :

— Zòtout i la dwètèt sav sé èvè touloulou
yo toujou chèché trapé chatou.
Menmjan zòtout ja vwè lè chatou kuit an kannari
i ka chanjé koulè pou viré vini rouj-diven !
Mé poukisa kilen é kijansa  kilòt ?

Photo Tony Mardaye.

Yémistikrik !

P’asi koté mwa sèktanm lè tout pyé-rézen chajé évè grap grenn vyolin an gran mitan lannuit lalin plenn ka kléré bòdlanmè tout chatou ozabwa ka sòti anba kay la yo té séré yo ka monté anlè wòch pou gadévwè ay jiké asi kèk branch  a pyé rézen-bòdlanmè. Lamenm vitman-présé : glouk ! glouk ! yo ka chajé bonnèt a-yo èvè grenn rézen byen wouj, byen vyolin, plen ji atoupannan yo ka valé détwa grenn onfwa-lamenm. Yo ja près tibwen grenné. E sé lè yo kay chèché désann pou déviré an lanmè-la tout touloulou ka sòti an tou a-yo ka sanblé anba sé pyé-rézen-la pou  baré sé chatou-la. Konba va ! Mi gawoulé ! Touloulou asi latè, tou a-y pa lwen I ka fè nonm a-y, èvè uit pyèt é dé modan.

Chatou li ni anni uit pat plen vantouz,
mé i lou
i chajé
bonnèt a-y plen grenn rézen
épi i pa an lanmè
i pa  an zafè a-y
I pa alèz kon Blèz
I onjan brenzeng
I présé.
Touloulou ka chèché koupé kèk pat a chatou
pou chayé vyann an tou a-y.
Chatou ka sonjé anni gadévwè
kijan i pé rivé an dlo-la
pou i ay lanbanné
sé grenn rézen a-y la
aladous
anba kay-la !

Mi pousa
Chatou hay Touloulou !
Mi konsa
Chatou an kannari
ka rann ji rézen-bòdlanmè
wouj, onjan vyolin !

Yékrak !

Touloulou. Photo Oceane Adjulro.

Viré monté