Potomitan

Site de promotion des cultures et des langues créoles
Annou voyé kreyòl douvan douvan

Calendrier des Insolites
Mars 2017

Rat é Manglous

Hector Poullet

Photo Marcel Vila

Ki yo nwè
Ki yo gri
Ki yo vèt
Ki yo mi
Rat sé rat !
Dépiwvwè yo on koté
fo yo gadévwè ka yo ni
pou yo mété anba dan a-yo.
Epi èvè sa
yo ka pitité !
San konté yo ka pisé asi sa yo fini manjé
pou lésèz i vini dèyè-yo gouté adan
trapé on vyé maladi
yo ka kriyé lèpto-spiròz.
San konté yo ka chayé pis asi-yo
Pé rivé ba moun pli vyé maladi ankò.
E sa konsa dépi Rat té pwan bato
pou té débaké an péyi-la.
Alòkifè on jou
moun touvé-yo boufi èvè lafanmi Rat.
Rat ka manjé patat, mayi, konkonm
Rat ka manjé fig-jòn, bannann
Rat jik ka manjé kann !
Yo ay chèché Manglous an péyi lòtbò
pou té fini èvè ras a Rat.
Débakyé Manglous té débakyé
Rat véyé chèché konpwann
konpòtasyon a bèt-vini la :
Manglous ka viv vi a-yo
anni granjou
lannuit yo ka dòmi !
Epi osi Manglous pa ka rivé monté asi pyébwa.
E poulòsdonk dépiwvwè Rat té konpwann sa
Yo désidé yo pa ka fè nich atè ankò
yo ka fè kabann a-yo an pyébwa
kon zozyo.
Yo pa kay pwonmlé pou chèché manjé granjou.
Atoupannan Manglous ka dòmi
lannuit tout bann Rat ka fè tout déribénal a-yo
pou mété tout daré a moun opiyaj
Sé lannuit Rat ka bay bal !
Kifè Manglous é Rat pa jen ka kontré.
Manglous oblijé touvé
ka li i kay rivé manjé :
Zé a poul, tipoul
Tout zé a tizozyo ka fè nich a-yo atè
 pèdri, toutwèl, zòtolan
Manglous ka touvé-y
i vini li osi on démon
pou moun péyi-la.
Pa menm dèyè koulèv Manglous pa ka kouri
An péyi-la toutmoun ka mété men si tèt :
Si Rat té koléra !
Manglous li sé lapès !

Photo Francesca Palli.

Viré monté