Potomitan

Site de promotion des cultures et des langues créoles
Annou voyé kreyòl douvan douvan

Les vieilles expressions idiomatiques créoles
Février 2019

Bwè dlo                                            
       pann kokoé ...                
                                      ... suiyé bouch !

Hector Poullet

Photo Geneviève Poulleti.

On chimen-chyen ka monté an mòn.
On nonm alamonté anba solèy-la.
Brandi-branda
nostròm ka ba kò a-y bann.
Ka fè cho !
Boug-la swèf !

Bò chimen-la on tikabèt
on joupa
sa pé sé on kaz
ola kèk moun ka rété.

— Pa ni ponmoun ?

Dèyè kaz-la
anba on goutyè banbou
on bari plen dlo.
Bèl dlo-lapli  ka kléré an solèy-la.
On koko-dlo
An bout a on kwòk
ka pann pa andèwò
asi bò a bari-la

— Pa ni ponmoun ?

Awa !
Boug an-nou swèf 
Alòs i dékòché koko-dlo la.
I pwan tibwen dlo-solèy
an bari-la
I bwè !
I bwè !
A wè, I té swèf !
Épi…
I woupann koko-dlo la
la i té pwan-y la
I suiyé bouch a-y
èvè do a men a-y
épi …
I ay fè chimen a-y
atètipo 
trankil kon Batis !

Menmjan pou vou
adan lavi
fè sa ou ni pou fè

Bwè dlo a-w
san néyé kyè a-w !
Pann koko-dlo la
la ou té pwan-y
Epi…
ay fè chimen a-w
 san viré dèyè gadé.

Photo Geneviève Poulleti.

boule

 Viré monté