Adan kaz a Manzè Mari on bann timoun sizé ka kouté kont.

— Krik !
— Krak !
— Dèpi jou wouvè
lanm a janbèt sansès ka rantré é sòti ?
— Zandoli
JOU NOU KÉ MÉTÉ AJOUNOU PÒKÒ VWÈJOU !
— Krik !
— Krak !
— Anba fèy, sizo fèmé é wouvè
asi chouk a bwadfè ?
— Poulbwa
JOU NOU KÉ MÉTÉ AJOUNOU PÒKÒ VWÈJOU !
— Krik !
— Krak !
— Zorèy-lanmè kolé atè
é ka kouté dézòd ka fèt ?
— Lanbi
JOU NOU KÉ MÉTÉ AJOUNOU PÒKÒ VWÈJOU !
— Krik !
— Krak !
— Anlè on ti-bout briz
i ka voyé zyé toupatou ?
— Malfini
JOU NOU KÉ MÉTÉ AJOUNOU PÒKÒ VWÈJOU !
— Krik !
— Krak !
— Dé siren a genbo a siren a pipirit
san pèd tan i ka fouyé trap ?
— Krab
JOU NOU KÉ MÉTÉ AJOUNOU PÒKÒ VWÈJOU !
— Krik !
— Krak !
— Kokozyé dékrasé
épi sab bòd-lanmè ?
— Woch-galèt
JOU NOU KÉ MÉTÉ AJOUNOU PÒKÒ VWÈJOU !
— Krik !
— Krak !
— Wòb-lanmò ripasé, plen flè,
mété lonbray òbò rivyè ?
— Mansèniyé
JOU NOU KÉ MÉTÉ AJOUNOU PÒKÒ VWÈJOU !
— Krik !
— Krak !
— Dé siren douvanjou a siren jakata,
razwè filé asi mèl a on réyon sòley ?
— Zeb-giné
JOU NOU KÉ MÉTÉ AJOUNOU PÒKÒ VWÈJOU !
— Krik !
— Krak !
— Pòt a'y fèmé, i ka véyé
dèyè jalouzi épi tout pikan drésé ?
— Manzèmari.
JOU NOU KÉ MÉTÉ AJOUNOU PÒKÒ VWÈJOU !

Adan kaz a Manzè Mari on bann timoun sèryé kon lafen fin kouté kont é ka chanté:

«JOU NOU KÉ MÉTÉ AJOUNOU PÒKÒ VWÈJOU»!

Sonny RUPAIRE

 Viré monté