Potomitan

Site de promotion des cultures et des langues créoles
Annou voyé kreyòl douvan douvan

Gloriyé pou Misyé Malté

Jean S.Sahaï
28.11.2012

Maxette et Malte

Jòdi la sé fèt à Misyé Malté Olsson, on Syédwa ki mayé dèpi 19 an èvè Maxette Beaugendre, on Gran Modèl Fanm Kréyol Gwadloup! Mi on gloriyé Jean S. Sahai maké pou Malté.

Misyé Malté! Bon fèt pou'w, an kyou a moun. An kyou a moun ki pa entélijan, é ki ka kwè tout blan sé blan. Misyé Malté ou ka onoré mwen é péyi an mwen!

Misyé Malté ou gloriyé péyi an mwen, ou mété kilti a'y o zolenpyad, é ou ranjé kò a'w pou Maxette divini on anbasadris a sa nou yé, o pli ho nivo ankò.

Misyé Malté, fo pa pon moun malpalé'w ni ba'w gaz, an péké pran sa ! Misyé Malté, malgré frédi a péyi a'w é moun blon a'y, ou rivé a fè yo aprésié Maxette, enmé Maxette, jalou Maxette é jis anvi kopyé Maxette, ou ka rann vou kont?

Misyé Malté ou sé on marabou! Ou fè solèy kléré tout lanné tou patou Maxette pasé, ou fè Maxette vwè péyi apré péyi é fè'y konprann valè a kréyolité a'y plis ki an pwop péyi a'y.

Mi sa pou nonm aprann fè pou fanm. Misyé Malté, vou é Maxette zot mérité viv lontan, lontan, lontan, paskè chak jou zot ka mété bòm é pasé lansan si bobo a limanité.

La vi sé on fèt, gras a zot, é toupatou zot pasé. I sifi an sonjé zot mwen kontan!

Misyé Malté, an ka ba'w kolyé flè a'w jòdi-la, fwi, konfiti, sinobol, grabio, épi bon zanmann é prino, pri No... bel a Lanmou Parfè. Bon fèt pou'w, Misyé Malté, an kyou a moun!

Jean S. Sahaï

boule

 Viré monté