Libèté !

Van lévé vin démaré,
vin détyenbwazé
konn lanbi san son,
tanbou san lapo,
dyòl san lang,
tchè flanngjé,
lachè tanné-rigwaziyé,
lèspri ababatizé-toumanté.

Zantray latè wouvè,
vonmi tankou kakarèl, san rété
tout zonbi nèg-bitasyon LAFRIK miklonnen.

Tann yo,
ka chignen
ka pléré,
ka rélé anmwé,
ka bougonnen
ka jenmi nan gran tanbi.

Konyéla, jòdijou
yo délivré,
yo mawon nan lenfè lanmò.
Fé-folèt nanm yo
ka sousounkléré kon bètafé.
Chalè solèy la, fréchè labriz la
ka miyonnen tankon longan lapotityè
tout mak fècho,
tout mak rigwaz,
tout mak bobo-chenn,
seyonnen jik dan zo yo,
ka dousi tankon longan lapotityè
tout tras travay an benn
tout tras lajòl-bitasyon,
tout tras dékoukounaj-fòsé,
ka dyéri tankon longan lapotityè
tout kras nonm zannimo
tout kras nonm zòdi
tout kras souchyen pasé chyen

Jòdla, an vwè yo
létyété nan lanm lanmè a,
pou viré-tounen nan zantray latè
MANMAN LAFRIK
Anba dlo, Manman Dlo
ba yo an ben-démaré
pou an wouspèl étènèl.

Tann pou tann,
kouté pou sonjé yo :
Sé ponmyé fwa an vwè dan a yo lablanni,
konfèdmanti, yo jwa,
yo ka ri krakrakra
padavwa yo rantré lakay.

Libèté !!!

Mé 1848
M’sav kontantman yo nan gran péyi miklon.