Laba bann-la ti derasinn zot pou amenn zot isi,
Zot ti gagn maltrete akoz zot kouler lapo.
Pa ti enan okenn respe pou zot lavi,
Zot pa ti gagn drwa gagn fre ouswa so.

Zot inn vini, ti tret zot kouman bann meb,
Mem bann pli gro zom for ti pass pou feb.
Lasenn dan lamin, lasenn dan lipie,
Bann bouro la, pa ti respekte zot dignite.

Ti amenn zot dan Rodrig pou travay later,
Akoz seki zot ete e zot linonsans bizin soufer.
Isi zot inn bizin pou exprim zot kre enn nouvo langaz,
Pou zot kapav malgre zot soufrans fer bann partaz.

Enan ki bizin souvo pou ale viv lib dan la natir,
Lavi pa ti fasil dan ti tizil kot pa fasil pou konstrir lavenir.
Ansam zot ti bien solider e zot ti viv an frer,
Mem dan soufrans e lapenn zot ti krwar dan leboner.

Kan lesklavaz inn aboli zot inn gagn zot liberte pli tar,
Mo bann anset kan zot inn libere zot pa ti vantar.
Zot inn al viv inpe partou dan lil pou kiltive,
E ansam tou dimounn ti viv dan lape.

Akoz enn bann gourman larzan zot inn martirize,
Gagn bate, pas mizer, zot inn bizin ferm zot lizie.
Zordi mwan desandan esklav avek konviksion mo dir :  ‘Ase’,
Mo pep merit lape e nou dir pa tous nou liberte.

Nou bann zanset pa kapav blie zot parski zot ti bien pasian,
Mem si zot ti esklav zot ti rev la liberte pou zot zanfan.
Zordi dan nou pei tou dimounn in melanze e nou form enn sel, enn tou,
Plis ki bann kouler larkansiel nou parey kouman enn disel ki donn gou.

+Jean Rex Casimir
25 Septam 2011

 Viré monté