Nwel mofwazé
Ayen pa ka fet san préparasion
Sé pou sa nwel ni lézavan.
Pandan lézavan é pa selman tanzantan
Tout bokal ka plen épi lapo zoranj
Ek tout model dot fwi kontel :
Jijib, zannana, marakoudja kisasayésa
Pou fè tout model litjè :
Litjè koko
pou kok-la chanté kokoriko
Litjè zannana
pou pa trapé épi vwazen pies nana
Litjè kosol
pou kalmé sa ka fè gwo majol
Sa sé té pou bwè.
Mé pou manjé, twa bagay nésésè
Pou pasé an bon nwel :
Yanm, kochon ek pwadangol
Dépi koumansman lanné-a
An ti-kochon (pa oblijé an mwatié)
Ka grosi épi tout lèrestan manjé
Ayen pa té ka gaspiyé.
Koko-sek pou rann viann-lan tann
Zeb-gra pou i pa vini tro gra
Délè menm an ti-kares anba bouden
Pou fèy dòmi.
Sa té ka rivé pou nou lé piti
Nou té enmen kochon-an pasé an chien
Sa té ka fè nou lapenn lè jou nwel-la té ka vini
Nou té ja sav « kochon pa chansé lavèy nwel »
Apré bon pléré nou té ka pléré
Sel konsolasion nou sé té blag pisa-a
Nou té ka fè an bel boul pou jwé foutbol.
Mé sa nou té pli enmen
Sé alé fouyé yanm anba bwa
Ni moun ka bay tout kalté non :
Yanm- sasa, bokodji, djanpal
Mé ni sa ki té ka manjé tout dot kalté :
Yanm jòn, yanm poul,
Yanm Sen-maten oben yanm Portidjez
Pòtanlè oben koko bourik té ka pousé anlè an piébwa.
Épi tout sé bagay-tala
Asiré nou té armé pou chanté kantik
Pas litjè té ka wouzé goj-nou
Wonm sé té pou lé pli gran
Paté salé ek janbou glasé épi fè cho
Epi tousa nou té paré pou pasé an bon nwel
Nou pa té ka alé an libsèvis
Mé sa sé té an tan
Tan fè tan tan kité tan
Nwel an 2019 mofwazé
Mé nwel toujou la.
Jid
|
