Kaz | Enfo | Ayiti | Litérati | KAPES | Kont | Fowòm | Lyannaj | Pwèm | Plan |
Accueil | Actualité | Haïti | Bibliographie | CAPES | Contes | Forum | Liens | Poèmes | Sommaire |
Kréyol a Kawol ka fè moun ri
Photo F.Palli.
On jenn tifanm milatrès
-déserten té ké di « kalazaza »-
té ka séré kò a-y anfon on taksiko
i té sòti Fòdfwans pou rivé Lamanten.
Manzèl limenm a-y té bizwen
yo dépozé-y douvan chimen laéwopò.
*
Dèwò-la sé loto-la té ka vansé
yonn dèyè lòt oralanti.
Tan-la té maré
dotwa gwo niyaj nwè
yo ka kriyé « machann chabon »
té sizé san brenné pou koré lorizon.
Andidan vwati-la
moun té boudé kon doubsis
figi té chifonné
konsidi sé pasajé-la té manjé
kong anrajé
oben dachin grajé.
Epi ou anni tann
On vwa sòti anfon taksiko-la
akwèdi on pipirit douvanjou ka kléwonné :
« Misyé chofè-a, pa obliyé-mwen on ! »
Zyé a tout moun ka kléré onfwa-lamenm.
Tout tèt anni viré gadé dèyè
Ou tann moun moun ka di :
- Oh quel beau créole !
- Vous êtes d’où mademoiselle ?
- Votre accent nous met du baume au cœur !
- Ni moun ka palé konsa ankò isi-a atè Matinik alòs ?
*
Kawòl té tou kontan lè i désann
sa té chouboulé poubonvré.
Andidan loto-la toutmoun té mété-yo
ka palé kréyòl
é sa té ka déchifonné figi a-yo.
Yo près tout té ka ri !
Loto-la limenm a-y té ka sanm sa i té vlé
soté-maté kon kabrit an savann
i pati ka bigidi dèyè sé lézòt loto-la.
Kifè syèl-la anni afiché dé bèl lakansyèl !