Té ni on boulanjri
an vil Lapwent
yo té ba-y non
 Opipirit-chantan 

Dépi tan-lasa
Lè nou ka di on moun
 i opipirit
sé davwa i abonnè.
Tousa poudavwa douvanjou
avan jou wouvè
avan kòk chanté
Pipirit asi tèt a on pyébwa
Ja ka bay-lavwa

Pipirit ! pipirit !

Épi a pa jé
Pipirit véyatif
granbonnè I ja ka chasé.
Tout tibèt ka volé
ka pasé pasi bò a-y
atoupannan yo anlè
Pipirit ka plonjé si yo
pou trapé-yo
èvè bèk a-y
alavòl.

Pipirit ! pipirit !

I ka pwopté syèl-la toulongalé
penga bòdé !
é déparfwa
i ka kontinyé chasé konsa
jik aprédavwa solèy kouché

Pipirit ! pipirit !

Hector Poullet

Note

1. Pipirit  ou Tyran gris: Tyrannus dominicensis.

Viré monté