Lè mwen ka bo'w asou kou,
Ou ka rann mwen poupoul,
Kon an poul adan lakou ki ni ti poul
Ki ka kouri dèyè'y toupatou.
Épi, tjè-mwen ka fè doum, doum,
Kon tanbou ki ka vini fou.
Fout ou dou !
Fout lanmou-nou dou !
Fout gou'w dou !
Fout ou ni an ti gou dou
Kon topitanbou.
Ou toujou ka fè ròl soud kon mannikou,
Lè mwen ka kriyé'w ti chou.
Mé, mwen ka wè ki'w ka vini rouj
Kon touloulou.
Ou mété mwen ajounou
Adan janm-ou kon an boug fou.
Poutji,
Pas mwen jalou ti madou vizou'w la.

RESTOG, Serge, 2002, Pawòl ki dous, Autoédition.

ISBN : 2.903843.06.6