Potomitan

Site de promotion des cultures et des langues créoles
Annou voyé kreyòl douvan douvan

KREYOLAD 486

Deng

13. Septembre 2013

Jid

An moustik jik rivé fè Alténò ped kréyol-li. Misié mété tout bel fransé’y déwò pou kriyé anmwé:

– Patat sa, ça me rend dingue!

Dépi an simenn, nostrom ni moustik alé viré akay li.

I achté an moustitjè: rien a fè!

I genyen an raket: ankò pli mal!

Magré I rayi sa, i pasé bon krèm anlè lapo’y, pa menm palé!

Sé manjé moustik ka manjé’y, épi dévoré’y toubannman.

I alé lanméri pou mandé fè an pasaj épi loto lafimen-an. Mé la i ped fwa, pas yo di’y asiparé yo volé an pies anlè aparèy-la. Kidonk yo pé pa simen lafimen ankò. Bagay pou sé moustik la ankò pli alez. Laradio jik anonsé an pidémi ka kouri an pliziè komin. Anlo moun trapé ladeng é nostrom koumansé pè, pas an 2011 lan, konpè’y Idelvè té anpami 18 moun an ki kasé pip yo a.

Ni an moustik atè isi, kidonk i pa sòti pabò Léjip, menmsi yo ka kriyé’y Ædes ægipti. I enmen dlo dann! Epi bel dlo! I pa bizwen anlo pou i sa ponn anlo zé.

Sel rimed ki ni sé chanjé dlo pòtaflè, ek pa kité pies dlo dòmi an kisiswa goutiè, bonm dlo oben vié né. Pas apré twa jou, Sé zé a i ponn an ka éklò lamenn.

Doktè Yè, ba Kima an konsèy, i di’y konsa: sa pa selman ma dlo ki ni yo, mé tout dlo alantou kay-la ka favorizé moustik la pou i simen dot piti.

Anlo moun ka vini deng toubannman épi moustik-tala, non selman ka anmewdé’w mé ka baw ladeng tou. E la pa ni lafet pas i ka tjwè moun sirtou ladeng émorajik-la.

Manmay sé chak moun ki pou goumen pou pa kité pies dlo ba moustik tala.

Jid

crabe

Sommaire Kréyolad

 Viré monté