Janmark pa nenpot ti-tjatja, é i té lé tout moun sav sa.

Manman’y mennen’y wè kwafè-a pou larantré. I mandé kwafè-a fè an ti-désen an tet-li. Manman-an kom tjansé, mé misié, éti ki ni douzan selman, di manman’y:

– Sé tet mwen man ni dwa fè sa man lé adan’y !

Man té ka espéré touw mwen, man tann bri pié misié. Ek man di an tjè mwen:

– An tan mwen asiré man té ké ja trapé an palaviré épi an souflé dèyè’y. Mé sa’w lé fè tan fè tan tan kité tan!

Ni an lè, toujou an tjè-mwen pas man pa lé brè dité pou maladi man pa ni, man di konsa :

– Asiré lè misié ké ni dizuitan i ké mennen lakopin dòmi kay manman’y, kon sa ja ka fet anlo koté.

Misié pa ka mété rad anlè’y si sé pa an lenj de mark. Menmsi sé an kochoni ki ni non Tacchini, sa pa grav! Menmsi sé an kokodil ki pa djè ni lakot ankò, sa pa ka fè ayen!

Dépi sé dènié mark lanmod misié Janmark abò.

Es lè i ké rantré simenn-tala sé not la ké ni an bel mark? Sé pa oblijé tout rad de mark ki ni an bon jennjan adan.

Pou Ogisten, papa’y ki ka trimé kon chat meg dan zaboka vet, sel mak i konnet sé sa i ka pozé anlè lanmè pou’y trapé pwason. Ogisten toujou mété sa i ni ek sa i pé, pas papa’y toujou aprann li, pa janmen pann chapo’y pli wo ki tet-li. Mé pou toutbon akondi pawol la: «tou sa ou pa lé an palapot ou, sé dret an ba kabann ou i ka séré».

Jid

Sommaire Kréyolad

 Viré monté