Potomitan

Site de promotion des cultures et des langues créoles
Annou voyé kreyòl douvan douvan

KREYOLAD 475

Kong-Ré

28. Juin 2013

Jid

Jédi pasé Konsey Jénéral té ni anlo gro mòdan lapolitik té sanblé anba lopsion Jozet épi SeLe.

Kom sa té ka fet lavey «Lafet lanmizizk» lè ou té ka bien kouté ou té ka kom konstaté tout moun an pa té akordé asou menm diapazon-an. Kisiswa klarinet, violon pianno oben tanbou anlo té dézakordé.

Sa ki té ka kouté adan radio té ka konstaté ki yonndé éli éti ki té lé réglé yonndé kont.

Sel bagay man konstaté, sé selman pa koté katrè yo rivé voté premié dosié-a asou wonz yo té pou wè.

Ou sé di ni dé éli ki té anvi manjé lézot la kon dé kong. Toupandan ni dot ka sanm yo pa djè anlè sa. Yo té ka kontinié najé akondi dé Ré wakawa alawoulib.

Vandrèdi, yo pou wè zafè transpow la, asiré la ké ni bon pawol ké fè anboutéyaj. Magré prézidant lan té i té ké ba chak moun 6 mini. Ni anlo éti ki ni bagay anlè tjè yo. Yo pa  ka tann mach fok yo palé.

Nou konstaté kanmenm té ni twa ki matébis. Kisiswa Chaben, Nestò oben Jan-Filip ki ni lò an kou’y (épi an ti-chenn). Yo dépozé lasimenn pasé Lasanblé nasional an propozision pou sé an sel kolektivité ki pou ka kondui tout transpò kisiswa an lanmè, oben abò loto. Apré kongré-tala es ké ni mwens anboutéyaj? Es ké ni mwens loto? Es ké ni mwens choman? Es nou ké pli avansé ki Misié Rikilé?

Nou ké wè.

Antouléka Jozet ja di i pa ka fè lafet i pa ni lentension ni bwè dlo pa nen, ajijéwè péché lanbi.

Asiré pa pétet plas la ké chè pas épi sel asanblé-a pé ké ni plas pou tout moun. Gouvelman ja di sé an sel manda pa moun asiré sa ké cho.

Sé bien pou sa ni sèten ka navidjé kon dé ré, pas yo ni lentansion kité, mé anlo anrajé akondi dé kong toubannman.

Jid

crabe

Sommaire Kréyolad

 Viré monté