Le loup plaidant contre le renard
par devant le singe

Enn fwa enn Loulou ti aprè plengnié
Ki doumoun i vol son kek soz.
I ti di pa n’a lot ki Réna ki kapab fer sa.
Réna ti resté pros, la mem kot li. Pou koken, pa n’a son met koma Réna.
A swar i lev la lin kousan, i al promné promné,
I vir vir touzou dan paraz poulayé.
Kan mem li sien i abwoyé, doumoun pa sòti, zot pè malfèzan.
Solman son landmen, zot war touzou enn kantité volay ki manké.
Zou ki zot bliy ferm pak mouton, zot kapab si son landmen va mank enn.
Koma zot konné Loulou osi i kontan la viand,
Zot met né né lò li osi. Zot di: «Réna pa ti a kapab manz tou sa li tou sel;
Ala en zou, Loulou mem i vin plégné. Zot anvoy sas Réna.
Réna i arivé. Ziz i démann li si li ki ti koken zafer Loulou a swar.
I di: «Lontan ou aprè koken patou, patou. Sa i dézagréab;
Fodrè sa i fini. Mo kwa la polis i dòmi.
Lé tan i komans ouvè li zié» Ziz la ti enn makak;
Y envway apel enn tiktak. (Zot konné tiktak enn bébet ki ana l’espri.)
Ziz i dmann tiktak si Réna i ana tò.
Tiktak i di: «Non.» - Makak i di zot: «A ben, mon séléra,
Al an prizon zot dè, ziska lè zot a pay lamann.»