Mo fin déza di zot ki si sa Réna; sa enn zanimo an Frans,
Mem péyi ek Sigogn. Sigogn la, enn zwazo ki resté o bò di lo,
Koma manik ek poul dlo. Sa enn zanimo malen;
Ou a war sa ta lè:
En zou frè Réna i envit Sigongn pou diné. Sigongn pa manké,
I arivé ek son bel lapéti. (Pou li gangn lapéti,
I bwar en pti ver labsent avan vini.) I pa ti douté,
Fas ki Konpè Réna ti pou fer li.
Konpè Réna i sèvi en manzé an di lo an di lo,
Dan en pti koté kalbas kasé, plat;
Lé tan Sigongn i aprè la ger pou sey la pes mòso,
Réna fin baflé tou net. I di malen, mé sa ti malonet.
Sigongn pa di li narien, i al sé li. Son landmen,
I envit Réna pou diner. Konpè Réna pa réfizé.
Lè diner i arivé, i trouv kouver fin mété,
Mé pa na en pla lò la tab. Sigongn ti fin ramas
Fiol di lo Kolongn, gargoulet, pou met tou manzé la dan.
Sigongn i dòn li enn serviet, enn fouset, enn kouyè
Aprè i di li: «Konpè, alon, san fason, a pa zenné, manzé.
Sigongn i komansé: «Kio ! kio, kio, kio,
Ou a di kanna dan di lo. En p’ti moman i fin balié
Tout manzé! Réna i fè tou magniè pou bwar la gel dan fiol
Pa fisi antré. Son la tet tro gro.
I pa gangn en pti lé zo.
Bon lodè manzé i fè li bavé. I ti oblizé tourn sé li,
San diné.

I an a bokou nou,
Ki kapab pran lekzanp lò la.